విరోధి ఉగాది

శ్రీసరస్వత్యైనమః
"విరోధి"ఉగాది
క.
స్వాగతము నవ ఉగాదికి
స్వాగతమిదె చైత్రశుక్లపాడ్యమి తిథికిన్
స్వాగతము తెలుగు ప్రజలకు
స్వాగత మిదియే విరోధి వత్సరమునకున్.
సీ.
క్రొత్తమావి చిగురు కొరికిన కోయిలల్
పంచమ స్వరమున పాట పాడ
మకరందమును గ్రోలి మధుకరీ బృందముల్
అలరుచు వింత నాట్యములు సలుప
తరులతాదులయందు విరియపూసిన పూలు
మారుతముల పరిమళము నింప
నవ వసంతాగమనము నవ్య కాంతితో
తెలుగు ముంగిళ్ళకు వెలుగు కూర్ప
తే.గీ.
చెఱకు విలుకాడు కూర్మి నెచ్చలిని కూడి
చైత్రరథమెక్కి జగమెల్ల స్వారి చేయ
రుగ్మతలు, విఘ్నములకు విరోధి యనగ
వచ్చినది విరోధి ఉగాది పర్వదినము
స్వాగతము పల్కగా రండు ఆంధ్రులారా!

తే.గీ.
సప్తగిరి వాసుడైన శేషాచలపతి
కామిత వరప్రదాత వేంకటరమణుడు
ఆయురారోగ్య భోగ భాగ్యముల నొసగి
సకల జనులను రక్షించి సాకు గాక!

సదా సంగీత సాహిత్యాల సేవలో
వేదుల బాలకృష్ణమూర్తి(వ్రాయస కాడు-నరసింహ)
శ్రీకాకుళం
విరోధి ఉగాది
౨౭-౦౩-౨౦౦౯