ఆంధ్ర భాష

౧.సీ:
అల నన్నయ కవీంద్రు డాంధ్ర భాష
రాణ్మహేంద్ర పురిని వ్రాయునాడు
నరహరికే గాని నరులకీయను కావ్య
మంచు పోతన నిర్ణయించునాడు
శ్రీనాథు కవితకు దీనారటంకాల
స్వర్ణాభిషేకంబు జరుగునాడు
అల్లసాని కృతికి ఆంధ్రభోజుడు కృష్ణ
రాయలు పల్లకిన్ మోయునాడు
ఆ.వె.
చెక్కు చెదరలేదు మొక్కవోలేదాంధ్ర
భాష ప్రాభవంబు; ప్రక్కదారి
పట్టి క్షీణదశకు వచ్చుచున్నది నేడు
దిద్దుకొనుము సుతుల తెలుగుతల్లి।

తే।గీ.
తెలుగు పలుకుల యందున్న తీపిమాట
తెలుగు సంగీత సుధలలో తేటయూట
తెలుగు పద్యాలలో నున్న తీర్పుబాట
నేర్చుననుమాట ఇతరుడు నీళ్ళమూట।