ఆట వెలది లోని అక్షర నాట్యాలు

ఆ.వె.
ఆట వెలది లోని అక్షర నాట్యాలు
ఆట వెలది కైన పాట నేర్పు
ఆటవెలది చూపు అందమౌ నడకలు
ఆట వెలదులకును ఆట నేర్పు.

ఆటవెలది తోడ అడుగు వేయు
ఆటవెలదులకును మాట నేర్పు
ఆటవెలది తోడ మాటలాడు
ఆటవెలది తోడ పాట పాడు.

విరోధి సంవత్సరాది

సీ.
విలసిల్లవలె నేడు విశ్వవిఖ్యాతమౌ
భారత సంస్కృతీ ప్రాభవమ్ము
వికసింపవలె నేడు విజ్ఞానశాస్త్ర సం
పద్విభూతి వెలార్చు వైభవమ్ము
విరజిల్లవలె నేడు విభుధవరేణ్యులౌ
కవుల కావ్యాలపై గౌరవమ్ము
వినిపింపవలె నేడు విమల గాంధర్వమౌ
శాస్త్రీయ సంగీత స్వరవరాళి
తే.గీ.
సర్వతోముఖ ప్రతిభయు శ్రద్ధ తోడి
బుద్ధి విరిసినయపు డభివృద్ధి కలుగ
ఆంధ్రదేశాన లలితకళానురక్తి
వరలుగాక విరోధి వత్సరమున.

రచయిత
(దూసి బెనర్జీ)
శ్రీకాకుళం
౨౭-౦౩-౨౦౦౯

విరోధి ఉగాది

శ్రీసరస్వత్యైనమః
"విరోధి"ఉగాది
క.
స్వాగతము నవ ఉగాదికి
స్వాగతమిదె చైత్రశుక్లపాడ్యమి తిథికిన్
స్వాగతము తెలుగు ప్రజలకు
స్వాగత మిదియే విరోధి వత్సరమునకున్.
సీ.
క్రొత్తమావి చిగురు కొరికిన కోయిలల్
పంచమ స్వరమున పాట పాడ
మకరందమును గ్రోలి మధుకరీ బృందముల్
అలరుచు వింత నాట్యములు సలుప
తరులతాదులయందు విరియపూసిన పూలు
మారుతముల పరిమళము నింప
నవ వసంతాగమనము నవ్య కాంతితో
తెలుగు ముంగిళ్ళకు వెలుగు కూర్ప
తే.గీ.
చెఱకు విలుకాడు కూర్మి నెచ్చలిని కూడి
చైత్రరథమెక్కి జగమెల్ల స్వారి చేయ
రుగ్మతలు, విఘ్నములకు విరోధి యనగ
వచ్చినది విరోధి ఉగాది పర్వదినము
స్వాగతము పల్కగా రండు ఆంధ్రులారా!

తే.గీ.
సప్తగిరి వాసుడైన శేషాచలపతి
కామిత వరప్రదాత వేంకటరమణుడు
ఆయురారోగ్య భోగ భాగ్యముల నొసగి
సకల జనులను రక్షించి సాకు గాక!

సదా సంగీత సాహిత్యాల సేవలో
వేదుల బాలకృష్ణమూర్తి(వ్రాయస కాడు-నరసింహ)
శ్రీకాకుళం
విరోధి ఉగాది
౨౭-౦౩-౨౦౦౯